Presentado o Plan Ribeira Sacra cun investimento de 34 M€ ata 2023, un paso adiante máis para que sexa designada Patrimonio da Humanidade

Con respecto ao plan que hoxe se deu a coñecer, precisou que é un instrumento de planificación que se articulará en 7 programas e que contén 35 accións que se desenvolverán nunha área duns 3.000km2 na que viven máis de 60.000 habitantes. Con melloras en eidos como: o patrimonio e paisaxe cultural; a ordenación do territorio; a conservación dos valores naturais e medio ambiente; o desenvolvemento económico sustentable, a xestión do turismo; a educación, formación e investigación ou a comunicación e participación.

O Plan Ribeira Sacra compromete máis de 34 M€, dixo, un investimento que involucra a 5 consellerías e do que se beneficiarán 25 concellos co obxectivo de que a candidatura chegue nas mellores condicións posibles.

Ademais, destacou que o dito plan define unha estratexia común para a correcta conservación e protección dunha zona de especial interese, a Ribeira Sacra, cuxa importancia reside no seu excepcional Románico, no seu patrimonio antropolóxico, na súa impresionante xeografía física, nas mostras de vida ermítica de occidente que alí se atopan ou nas mostras de enxeñaría asociadas ao cultivo das vides.

Cómpre resaltar que esta planificación engádese a outras iniciativas como o Plan de acción estratéxico para a Ribeira Sacra, que foi a Consello en setembro, na que se inscribe a candidatura técnica da Reserva da Biosfera da Ribeira Sacra e Serras do Oribio e Courel que avanza en paralelo á de Patrimonio Mundial. “Sería un gran fito para Galicia que a Ribeira Sacra obtivese eses 2 recoñecementos”, abundou.

Plan especial de Infraestruturas e dotacións do consorcio local dos Peares

Por outra banda, o titular do Goberno galego tamén foi partícipe da sinatura da Orde de aprobación definitiva do Plan especial de Infraestruturas e dotacións do consorcio local dos Peares, un instrumento de vangarda na ordenación do territorio que, por primeira vez, abrangue 2 provincias e 4 concellos, facendo da complexidade unha oportunidade. Tivo lugar, asegurou, só uns días despois da aprobación no Consello do Proxecto de Lei de ordenación do territorio.

As actuacións previstas neste plan, explicou, deixan planificados preto de 15 M€ de investimento que se irán executando co obxectivo de realizar distintas accións como: a urbanización do borde fluvial do río Búbal, a pavimentación de accesos á estación ferroviaria ou a ampliación do paseo do río Miño, que xa está en marcha. E tamén actuará como guía para a mellora das condicións estéticas.

En definitiva, sentenciou, para lograr poñer en valor o noso territorio son imprescindibles ferramentas como o Plan Ribeira Sacra e o Plan especial de Infraestruturas e dotacións do consorcio local dos Peares.
R.