O Real Padroado de Santiago presenta a proposta estratéxica plurianual do Consorcio 'Camiño de Compostela 2032'

Antonio López, reitor da USC, participou esta fin de semana na xuntanza do Real Padroado da Cidade de Santiago de Compostela, a primeira que se celebra nos últimos 18 anos e que busca desenvolver un modelo transformador para a cidade. A institución universitaria é un dos elementos definitorios de Santiago como cidade patrimonio cultural da humanidade e como final do Camiño. Esta condición de cidade universitaria “forma parte, como segunda natureza, do ser mesmo da cidade”.

A xuntanza do Real Padroado serviu para presentar a Proposta estratéxica plurianual do Consorcio de Santiago para o período 2021-2027-2032 `Camiño de Compostela 2032´, no que se recolle un investimento global de 281, 56 millóns de euros para o período 2021-2032. O documento define un ambicioso proxecto de inversión plurianual do que a USC participa con diversos proxectos, que forman parte do seu plan de infraestruturas, de carácter estratéxico para vindeiros anos: a conservación de edificacións históricas como a Facultade de Xeografía e Historia ou o actual edificio da Facultade de Medicina; a humanización e o fomento dunha maior conexión do Campus Universitario co resto da cidade; ou o da futura Cidade da Saúde, entre outros.

O traballo previo realizado dende a USC a través, entre outros, do Plan de Infraestruturas permite a formulación de proxectos para cada unha destas actuacións, dando sentido ao investimento anunciado, ao tempo que constitúe un enfoque fundamental para planificar o calendario de traballo.