A oferta cultural do Ano Franciscano, nos 53 concellos das rutas xacobeas galegas

A Consellería de Cultura, Educación e Ordenación Universitaria programará, con motivo da celebración do Ano Franciscano, actuacións escénicas e musicais en 53 concellos galegos ao longo do vindeiro mes de outubro.

Baixo o título Cultura no Camiño, as localidades participantes, todas elas radicadas nas distintas rutas xacobeas, acollerán concertos de diversos estilos, así como funcións de teatro, danza, maxia e novo circo nun intenso calendario de actividades coordinado pola Agadic (Axencia Galega das Industrias Culturais) coa colaboración de Turismo de Galicia como parte da conmemoración do oitavo centenario da peregrinación de San Francisco de Asís a Santiago de Compostela.

Co obxectivo de impulsar a descentralización da oferta cultural galega, achegándoa deste xeito ao maior número posible de espectadores, a Consellería de Cultura e Educación dirixiu esta iniciativa de xeito específico aos concellos dos Camiño de Santiago que non forman parte da Rede Galega de Teatros e Auditorios. Trala súa inscrición, deberán achegar o 50 por cento dos custos do programa, así como seleccionar os espectáculos e/ou concertos concretos que se exhibirán nos seus respectivos escenarios, cun mínimo de dúas actuacións por concello.

Oferta para todos os públicos

Os xestores culturais locais poderán elixir cadansúa programación dentro do amplo abano de 570 propostas para todos os públicos recibidas a este fin na Agadic. Delas, 301 corresponden a concertos de todos os estilos musicais, 76 a funcións de teatro para adultos, 84 a títulos de teatro infantil, 38 a espectáculos de danza (7 dirixidos a nenos), 45 a actuacións de maxia e 26 integrados por disciplinas enmarcadas nos distintos xéneros do novo circo.