O Premio Cervantes Antonio Gamoneda pecha o programa Camiño ao Andar

O premio Cervantes Antonio Gamoneda e o escritor italiano Erri de Luca intervirán na que será a última sesión das xornadas de reflexión e diálogo Camiño ao andar. Organizadas por Xacobeo 2010 dentro da súa programación de Camiño da Reflexión, estas xornadas permitiron desde o pasado 18 de outubro escoitar no Centro Galego de Arte Contemporánea (CGAC) e na sede da Fundación Cidade da Cultura de Galicia a expertos de distintas disciplinas da cultura contemporánea, como Shlomo Ben Ami, Félix de Azúa, Gerard Mortier, Rafael Moneo ou Michel Bauwens. Para esta tarde está prevista a participación de Georges Didi-Huberman e Estrella de Diego, que falarán a partir das sete no Auditorio do CGAC.

O escritor, tradutor e poeta italiano Erri de Luca será o encargado de comezar ás sete da tarde no CGAC a sesión de mañá coa súa conferencia, titulada O camiño en zigzag da liberdade. Autor dunha poderosa obra literaria marcada por elementos autobiográficos como a súa militancia na extrema esquerda italiana ou a súa experiencia como obreiro, camioneiro ou albanel, na súa intervención reflexionará sobre como a palabra pública, a poesía, o canto ou o teatro poden conducir aos camiños da liberdade.

A partir das oito Antonio Gamoneda, unha das principais figuras vivas do panorama poético en lingua española, pronunciará a última conferencia de Camiño ao andar, titulada Creación estética de e sobre o Camiño: forma, iconografía, escritura. Nesta intervención fará un seguimento espacial e temporal de aspectos estéticos presentes ou suscitados polo Camiño de Santiago. A partir das nove do serán celebrarase un coloquio, no que poderán participar os inscritos ás conferencias de mañá, nas que xa non hai prazas dispoñibles.

PROGRAMA 28/10/2010. Auditorio CGAC
19:00 Erri de Luca
O camiño en zigzag da liberdade
20:00 Antonio Gamoneda
Creación estética de e sobre o Camiño: forma, iconografía, escritura
21:00 COLOQUIO