A banda dos 60 The Zombies, por primeira vez en Galicia o 11 de novembro

A formación inglesa The Zombies actuará o 11 de novembro en Vigo, nun concerto enmarcado no ciclo Xacobeo Importa. A actuación terá lugar na Sala Mondo da cidade olívica e comezará ás 22.00 horas. O concerto de The Zombies súmase aos que ofrecerán Mudhoney, Young Fresh Fellows e Interpol. Deste xeito, un novo nome de culto únese á nómina de grandes artistas que xa pasaron polo Xacobeo Importa, que ofrece unha programación de calidade e variada que abarca os estilos musicais máis diversos.

A banda The Zombies formouse a finais do ano 1959 na cidade inglesa de St. Albans, cando o teclista e compositor Rod Argent se uniu coa voz de Colin Blunstone e o talento compositivo de Chris White. Misturando pop, R&B e algunha pincelada de jazz, empezaron a dar forma a unha banda que deixou numerosos éxitos atemporais. Agora, un dos grupos máis importantes que xurdiu nos anos 60 chega de xira a España e estrease en Galicia para repasar os seus grandes éxitos. Para os que medraron coa súa música ou os coñeceron despois, esta será unha ocasión única para poder goza cos éxitos de The Zombies.

The Zombies son os autores de éxitos como She's Not There, Tell Her e do disco Odessey and Oracle, un traballo que os aproximou á psicodelia, cheo de imaxinación e no que Argent e White alcanzaron o seu cénit creativo. Cancións do talle de Care of Cell 44, Hung Upon a Dream, Rose for Emily, Brief Candles e o clásico Time of the Season convertérono nun disco de culto.

No ano 2005 estiveron actuando en España como cabezas de cartel do Purple Weekend e
en marzo de 2008, a banda reuniuse en Londres para celebrar o corenta aniversario do seu exitoso Odessey and Oracle, actuando tres noites seguidas no Shepherd’s Bush Empire. O ano pasado chegaron ao festival Azkena Rock de Victoria para compartir cartel con artistas do talle de Alice Cooper ou The Black Crowes.