Xacobeo 2010 lanza unha aplicación en realidade aumentada para móbiles

Xacobeo 2010 ven de lanzar unha aplicación en realidade aumentada para teléfonos móbiles que ofrecerá, sobre unha imaxe captada en tempo real coa cámara dun teléfono móbil, información sobre os albergues da S.A. de Xestión do Plan Xacobeo, programación de Xacobeo 2010 e puntos de interese do Camiño de Santiago.

Con esta iniciativa, Xacobeo 2010 dá un novo pulo á utilización das novas tecnoloxías e á súa implantación e desenvolvemento no Camiño de Santiago, en consonancia co avance da sociedade da información, ofrecendo contidos con valor engadido a aquelas persoas e peregrinos que estean interesados en viaxar a Compostela.

O director xerente da S.A. de Xestión do Plan Xacobeo, Ignacio Santos, sinalou que as novas tecnoloxías “son unha ferramenta idónea para a transmisión dos valores e o enriquecemento que supón a experiencia do Camiño de Santiago”. Neste sentido, a aplicación móbil contribuirá a que o “espírito de Xacobeo” permaneza no tempo, seguindo os valores baixo os que se trazou a programación de Xacobeo 2010 de desenvolver contidos que trascendan ao Ano Santo, de forma que se conserve a capacidade de atracción tanto de peregrinos coma de visitantes. Para iso, sinalou, é preciso dispor contidos que faciliten e implementen a peregrinación cara Compostela ou a estancia na comunidade.

Na súa intervención, Ignacio Santos destacou que esta aplicación supón “un paso importante no que chamamos Camiño Tecnolóxico” e engadiu que desde xaneiro a web www.xacobeo.es recibiu máis de 900.440 visitas de 672.104 usuarios únicos. Asemade, Xacobeo 2010 dispón dun perfil en Facebook e Twitter con recomendacións para os peregrinos, que conta con 2.806 seguidores. A esta cifra hai que engadir as 55.704 que xa son seareiros do Facebook dedicado á información sobre a programación de Xacobeo 2010.

A realidade aumentada amosa información adicional a unha imaxe captada en tempo real. Para poder empregar esta vantaxe é necesario contar cun teléfono móbil Iphone ou cun sistema operativo Android e ter instalado, ademais, o software Layar, unha aplicación gratuíta que combina a utilización do GPS, a brúxula dixital, a cámara e a conexión permanente a internet, e que posibilita identificar a posición do usuario para ofrecerlle información adicional sobre a imaxe que está a captar neses intres coa súa cámara. Neste sentido, Layar dispón os datos a amosar en “capas” de información.

Neste punto é onde a empresa galega Signo desenvolveu para Xacobeo 2010 unha capa de información que ofrecerá aos camiñantes ou visitantes contidos adicionais e en tempo real sobre albergues, programación ou puntos de interese. Os usuarios, que poderán descargarse esta capa de balde e que xa está operativa, atoparán a información de maneira moi intuitiva, cómoda e áxil, obtendo contidos que se actualizarán de xeito constante e que estará sincronizada coa web de Xacobeo 2010 (www.xacobeo.es). O único requisito para empregar esta capa é o de rexistrarse previamente na web de Xacobeo ou facelo nese mesmo intre a través do seu móbil, xa que o usuario e o contrasinal serán os mesmos para ambas aplicacións.

Así, por exemplo, un peregrino poderá ver os albergues da S.A. de Xestión do Plan Xacobeo unha vez chegado ao fin dunha etapa, a ficha do establecemento e contacto, a súa posición con respecto ao Camiño de Santiago, ademais de instrucións precisas da ruta que ten que seguir para chegar ata alí. Do mesmo xeito, unha persoa que viaxe a Compostela poderá ver mentres pasea e a través da imaxe que capta nese momento no seu móbil os distintos puntos de interese que pode ver nesa zona, unha ficha completa e galerías de fotos dos mesmos, e, tamén, os próximos eventos dos que pode gozar durante a súa estancia, podendo, do mesmo xeito, delimitar a información que aparecerá na capa ao tempo que permaneza en Compostela.