Xacobeo 2010 presenta a obra Unha noite branca cos clásicos, de Blanca Marsillach

Xacobeo 2010 presentou n Santiago de Compostela a obra de teatro Una noche blanca con los clásicos, que hoxe se representará en Pontevedra e en Ferrol. Esta obra, protagonizada por Blanca Marsillach e dirixida por Ángel Ojea, está enmarcada no Camiño das Artes Escénicas da programación de Xacobeo 2010. A cidade do Lérez acolle a representación desta obra, que comezará ás 20.00 horas na sede da Fundación Caixa Galicia. O venres 21 de maio será a quenda de Ferrol, onde a representación será tamén a partir das 20.00 horas na sede que a fundación ten nesa cidade.

O Camiño das Artes Escénicas de Xacobeo 2010 presenta as montaxes relacionadas con danza e teatro, maxia, e espectáculos de acrobacias, luz, son e ritmo. Trátase de proxectos cunha única linguaxe internacional, baseada no talento persoal e por encima de todo, na creatividade. Asemade, préstase atención aos espectáculos de pequeno, mediano e de gran formato dirixido a todos o públicos.

Na rolda de prensa celebrada esta mañá estiveron presentes o director xerente da S.A. de Xestión do Plan Xacobeo, Ignacio Santos Cidrás, a actriz Blanca Marsillach, e as actrices galegas Victoria Teijeiro, elixida especialmente para estas dúas actuacións en Galicia, e Elena Reiriz, que tamén debuta en Pontevedra e Ferrol. Na súa intervención, Ignacio Santos destacou que a chegada desta obra a Galicia, no marco de Xacobeo 2010, supón “unha oportunidade única para gozar dun espectáculo destas características, no que se achegan ao público as obras dos grandes clásicos”. Por iso, gabou “o empeño persoal” da actriz Blanca Marsillach para sacar adiante este proxecto que agora fai parada en Pontevedra e Ferrol.

Una noche blanca con los clásicos é a adaptación dunha obra estreada en 1997 por Adolfo marsillach. O concepto do que parte esta representación é o de que Blanca Marsillach e o seu pai, Adolfo Marsillach, nunca traballaron xuntos e que agora, oito anos despois da morte do dramaturgo, ambos atópanse por primeira vez nun escenario. Deste xeito, Blanca Marsillach recupera a obra que estreou seu pai hai trece anos, pero faino a través dunha pantalla electrónica onde se proxectan escenas nas que aparece o dramaturgo para reproducir un diálogo poético entre ambos. Neste encontro virtual, pai e filla interpretan algunhas das personaxes máis importantes do teatro clásico español.

A obra Una noche con los clásicos foi unha idea orixinal de Adolfo Marsillach que estreou no ano 1997, xunto a Amparo Rivelles e María Jesús Valdés. O dramaturgo fixo unha selección de textos dos mellores versos dos séculos XVI e XVII, os escritos por poetas como Garcilaso de la Vega, Gutierre de Cetina, Fray Luis de León, Francisco de Quevedo, Luis de Góngora, Lope de Vega, Gil Vicente, San Juan de la Cruz, Calderón de la Barca e Miguel Hernández, acompañados das composicións musicais que, arrincando das cantigas de Alfonso X El Sabio, chegan ata Cristóbal Morales, Antonio de Cabezón e Tomás Luis de Victoria.

Para lograr compartir escenario co seu pai neste proxecto que agora chega a Galicia da man de Xacobeo 2010, Blanca Marsillach recorreu ás gravacións orixinais de Adolfo Marsillach na súa representación de Una noche con los clásicos, das que seleccionou varias pasaxes nas que o actor recitaba os poemas. Esta revisión da obra de Adolfo Marsillach, dirixida por Ángel Ojea, propón un espectáculo interactivo que se estende ao público, ao que se lle da a oportunidade de compartir escenario con Blanca Marsillach.

Os primeiros pasos de Blanca Marsillach no teatro foron da man do seu pai, o recoñecido actor Adolfo Marsillach, na obra Matahari. Continuou no Teatro Clásico con José Luis Alonso en La Celestina y La Dama Boba, alternando a súa carreira co cine baixo directores da categoría de Alberto Latiuada, Mario Monicelli y Javier Aguirre e colaborou en series de televisión. En Estados Unidos formou compañía para producir en inglés a obra Loco de Amor de Sam Shepard. Hai tres anos, Blanca iniciou en España a súa carreira como empresaria, levando a cabo exitosas montaxes.